سؤال عن تسميد و رش البصل

[wesammm]

جزى الله الاخوه القائمين على المنتدى كل خير
في منطقتنه زراعة البصل محصول اساسي في قرى دلتا مصر بس لما قريت مواضيع الاخوه في المنتدى حسيت ان فيه فرق كبير في طريق التسميد يعني احنا معظمنا بنسمد الارض بحوالي 17 شكارة نترات ولوريا
على 3 دفعات
ودلوقتي احنا بعد الزراعة بحوالي شهر منكن نحط لارض البصل بوتاسيوم وكبريت وسوبر ولا لازم يكون التسميد ده قبل الزراعة بس
وبالنسبه للرش فعلا مينفعش خلط المبيدات مع بعضها يعني الريدوميل مع الدياسين او الدياسين مع الكبريت ورش الكبريت باستمرا مفيد للبصل
وايه هو افضل المبيدات المقاومه للفطريات واللي تساعد على النمو الخضري للبصل بس مينكشي فيها هرمونات فيه اخ قالي ان افضل المبيدات دلوقتي للبصل هو بيليز لانه الوحيد اللي يعتبر متغشش اما باقي المبيدات الموجوده فمعظمها مغشوش يعني ياريت برنامج مناسب للرش البصل
وجزاكم الله كل خير على مجهوداتكم الطيبه

مواضيع مشابهة:

• سؤال عن تسميد أشجار المشمش
• استفسار عن تسميد البصل
• تسميد محصول البصل
• سؤال لأهل الاختصاص حول تسميد الأرز
• سؤال عن تسميد النباتات

[بسام صالح]

ممكن تدانى فكر عامة عن برنامج التسميد والرش وانا اقولك مناسب ولا لاء

[الابلج]

حبيبي وسام
عامل ايه .......يارب تكون انت واهل الدلتا كلهم بخير
طيب
أولاً : علميا يا اخ وسام فدان البصل يحتاج الى 90- 120 وحدة آزوت
بإختصار لو هيكون مصدر النيتروجين هو النترات ( 33% ) يعني هتحتاج حوالي 6-9 شيكارة نترات 50 كجم
طيب ..... لو هيكون مصدر النيتروجين هو اليوريا ( 46%) وده أمر غير مرغوب ، عموما هتحتاج حوالي من 4- 6 شيكارة يوريا 50 كجم .
والأفضل طبعاً كما تفضلت ذاكراً استخدام المصدرين معاً مع مراعاة فرق النسب .
أما عن استخدامكم في قرى الدلتا 17 شيكارة نترات ويوريا............................. .ده معدل مرتفع جداً جداً
لماذا ؟؟؟ .....................لأن التجارب العلمية والعملية أثبتت أن البصل لا يستجيب للتسميد الآزوتي الأعلى من 120 وحدة أيا كان مصدر النيتروجين .
ونحن هنا فلاحي محافظة الفيوم نقوم بإضافة 6- 7شكاير نترات (33%) على طول الموسم فقط لا غير
ولكن بجانب هذا نهتم جيداً بالتغذيةالورقية . فنقوم برش البصل كل 15 يوم بالسماد الورقي مضافا ً معه المبيد الحشري أو الفطري .
ثانياً : بالنسبة لإضافة البوتاسيوم والكبريت والسوبر
بصراحة انا هشد في شعري من الغيظ ..................
يا جماعة ياما قولنا وعدنا ان السوبر فوسفات والكبريت الزراعي أحسن اضافة ليهم قبل الحرثة الثانية قبل الزراعة .
ولازم السوبر فوسفات يخلط جيدا مع تربة الأرض ، أما الكبريت فهو عنصر فعال لتحسين خواص التربة ،
وهو بطيء الذوبان في الماء ( كما تعلمون جميعاً) طيب ليه تأخرو اضافتوا لبعد السدة الشتوية ؟؟
هو عموما هيدي نتيجة بردوا .............لكن نحن نتكلم عن الأفضل والأنفع للنبات .
ولكن بالنسبة للبوتاسيوم فإضافته تكون أفضل ما يمكن عند مرحلة صب البصلة للمساعدة وتشجيع انزيمات النقل على العمل وبالتالي تقوم بتخزين ناتج الغذاء من الأوراق الى قواعد الأوراق ( البصلة) . ويكون معاد اضافته مناسب كما ذكرت .
ثالثاً : بالنسبة للمبيدات وخلطها مع بعضها البعض وعلى فكرة ( أنا صاحب محل مبيدات ) .
الريدوميل مانكوزبي 72 المواد الفعالة به
1- ميتالاكسيل 8 %
2- مانكوزيب 64 %
الدياثين م 80 المادة الفعالة به
مانكوزيب 80 %
يبقى بالعقل أخلط الأثنين مع بعضهم ليييييييييييييييه ؟
( أحمد زي الحاج أحمد ) مفيش فرق
يبقى الخلط ما بينهم يعتبر هدر للمال الخاص لا أكثر ولا أقل .
ثم انت عارف البيليز اللي قالك عليه الأخ الفاضل ( مستشارك الرسمي ) بكام .....؟؟؟؟
بــ 220 جنيه الــ نص لتر .
يعني باهظ الثمن جدا جدا جدا .
وأنا مش هنكر ان في مبيدات مقلدة في السوق ( وليست مغشوشة بمعنى الكلمة) ولكن العبوة واضحة جدا جدا لأي واحد . ولكن ده لا يعني ان السوق ( كله مغشوش ) كما قلت .
عموما هذا رابط الصفحة الأخيرة من موضوع المرشد في زراعة البصل به برنامج رش متكامل أرجوا انو ينال رضاك .
http://f.zira3a.net/showthread.php?t=4538&page=5
آسف على التطويل .....دمتم بود

[wesammm]

والله يا اخي الابلج انا مش عارف اشكرك ازاي بارك الله فيك اخي وربنا يجزيك كل خير
وجزى الله الاخ سام صالح على الرد كل خير
بارك الله فيكم

[romero_12345]

الاخ الابلج
تحية طيبة وبعد
بعد اذنك لما تتكلم وتقول معلومة ياريت تتكلم وتقولها صح
1- البيليز اللي حضرتك بتقول عليه باهظ الثمن وهو نص لتر
اسمحلي اقول لحضرتك انت بتتكلم كلام فيه شيء من الغلط
عبوة البيليز 300 جم يا سيدي الفاضل مش نص لتر زي مابتقول حضرتك
وانت بتتكلم علي سعره من غير ماتعرف تكلفة الفدان كام ؟ ومن غير ماتعرف نتايجه ؟
عن تجربه شخصية وللامانة
استخدام مبيد معروف ومضمون ومن شركة محترمة ومعروف مصدره بيكون اقل في التكلفة من لامبيدات المغشوشة او المقلدة - زي مابتقول حضرتك- بتطول المدةبين الرشتين ده غير النتايج
يعني بالبلدي كدة
الغالي رخيص

[الابلج]

المهندس / romero
طبعاً أنا لن أعاتبك على طريقتك في الكلام مع تحفظي الشديد عليها
لقد قمت بالرد على أخي السائل وسام في عدة نقاط منها عدد وحدات الآزوت في الفدان والمبيدات البديلة في السوق بديلة ( البيليز) وعن الخلط بشكل عام وأظن أن ردي واضح لا يحتاج الى توضيح
وتفضلت أنت وبكل غرور وتتهمني أني لم أقل المعلومة بشكل صحيح وأني لا أتعالى عن التصحيح ولكن أرحب به جدا جدا .
ولكن الغريب جدا أن كل ما أخطأت به أني ذكرت أن البيليز بدلاً من قول أن العبوة 300 سم ذكرت أنها نص لتر !!!
والغريب أيضا أنك لم تناقشني في أي من الفنيات المذكورة ، أو حتى أنك لم تتطلع على الرابط الموجود في الرد وتضيف أي تعليق .
وهناك أمر آخر ............لا أحد أبدا ينكر أن مبيد البيليز مبيد جيد وفعال ولكن باهظ الثمن جدا جدا ونظرا لذلك فلا يستخدم إلا في الحالات القصوى فقط . توفيرا للنفقات .

عموما لن أجادلك في شيء كهذا .....كل مقتنع بما في رأسه . ........ولا عتاب

[moatazelkashef]

السلام عليكم ورحمة الله وبركاته
لك جزيل الشكر أخى الأبلج على المعلومات القيمه التى أضفتها فى الموضوعين حيث أننى كنت أركز على موضوعك المميز المرشد فى زراعة البصل و هو موضوع شامل تستحق التهنئه عليه و أحب أن أقول لك أن تواصل فى نفس مستواك دون النظر إلى المحبطين الذين لا يقدرون مجهود أحد وليس عليهم سوى تصيد الأخطاء للغير دون إظهار نفع منهم فيجب ان يكون النقد بناء وإيجابى يؤدى إلى زيادة المعلومه وتوضيحها لا الإحباط للغير وتصيد صغار الأمور...
وفقك الله و جزاك خير الجزاء

[حسن حسن]

الاخ المهندس
romero_12345
لك كل الحق فى تعديل المعلومة
ولكن ليكن فى علم حضرتك أن الباشمندس الأبلج ذو خبرة كبيرة جدا ويكفى أن كل من تعامل معه يحترمه ويقدره بما فيهم اساتذته فى الجامعة
وليس معنى أنه من الإجهاد أثناء كتابة الرد ولسرعة الرد يكتب شئ هو نفسه لو قرأه مرة أخرة سيعدله
وكلنا يفعل ذلك فى كثييييييييير جدا من الأحيان
وشكرا

[wesammm]

بسم الله الرحمن الرحيم
جزى الله اخونا الابلج على افادته الطيبه اخي بالنسبه للبليز وعموما انا جربت البليز والاميستار والريدوميل جولد بلص و فضلت اكون بعيد عن المانكوزيب ظنا ان ان المنكزيب ماده مسرطنه وبعد كده اتضح ان المانكوزيب غير مسرطن وانه هينزل في خمسه الجاي ان شاء الله وفعلا المشكله ان البليز غالي هو فعلا قوي بس تكلفته عاليه وبالنسبه لمدة بقائه في النبات سبع ايام دي حسب تجربتي معاه بالنسبه للاميستار جاب نتايج احسن من البليز بالنسبه ليه سواء في المعالجه او في مدة البقاء في النبات وخصوصا ان تكلفة رشة الاميستار اقل من البليز معا ان الاميستار ميكروبي والبليز كميائي ومنشأه امريكي
وطبعا حضرتك عارف ان الشركه المنتجه للاميستار هي نفسها المنتجه للريدوميل بس الاميستار منتج بكتيري من افرازات عيش الغراب اما الريدوميل متالاكسيل ونحاس واذا نزل الريدوميل المانكوزيب اتوقع ان نتيجته هتكون كويسه طبعا انا مبتكلمشي على الريدوميل المانكوزيب الموجود في مصر حاليا لانه متقلد ود ي واضحه جدا بعد اسم الشركه المنتجه مفيش اجرو الشركه الاصليه ولكن فيه لوقاية المزروعات وتيهليه كله عارف الشركه دي اللي هي في مصر طبعا وصراحه علشان ما اظلمشي الريدوميل المانكوزيب انا مجربتوش على احكم على كفائته وطبعا السوق فيه مبيدات فطريه يامه الوقائي والعلاجي انا شوفت ال ميتاسيل وتركبته شكلها ممتازه وفيه الانتركول
عموما انا كفلاح بدور على اللي يجيب نتيجه كويسه وتكون تكلفته بسيطه
فمنكن بمشي بمبيد فطري عادي واذا نزلت اصابه جامده باستحدم مبيد فطري قوي
اما لطول فطرة البقاء توفر في استحدام المبيد بالنسبه للمبيدات اللي فترة بقائها 15 و20 يوم في مشكله ان الجو لو مطر مهما تكون راشش سواء قالو دا جهازي ومقاوم للمطر بصراحه تجربتي انه نزل ندوه برده بعد المطره وعلى فكره انا جربت الكبريتوب والبوليرام وال متاسيل وفولنت وكم نوع بس برده مش عاوز احكم نهائي على اي منتج لان ده اول موسم ازرع فيه ولاني كنت بجرب المبيد لمره واحده ماعدا الاميستار اللي اشتغلت بيه ومازلت شغال بيه وبالنسبه للبوليرام انا فعلا اشتريته بس للا سف فيه مواضيع بتقول ان الميترام الماده الفعاله له مسرطنه والله اعلم وجزاكم الله خيرا

[wesammm]

ياريت وحد من الاخوه يوضحلنا اذا كان ممكن اخلط الاسمده الورقيه مع بعضها
1 فيه مشاكل عند خلط البوتاسيوم مع ماده سامه ذي الاكتاكرون والبستان ورشهم سويا على النبات البصل
فيه مشاكل عند خلط الاسمده الورقيه ذي الكريستالون مع الاحماض الامينية
هل ممكن اخلط الكالسيوم مع البوتاسيوم.-
هل فعلا انه عند اضافة المادة السامه مع المغذي يسبب تلف في انسجة النبات وفعلا ان اضافة الماده السامة مع المبيد الفطري بيقلل من كفاءة المبيد الفطري..
فيه ناس بتحذر من الخلط فبنطر نرش البوتاسيوم لوحده والماده السامه لوحدها والمبيد الفطري لوخده
فدان البوتاسيوم بيحتاج كم كيلو بوتاسيوم علشان يصب لان كثافة البصل في الارض عاليه وكام يوم بين الرشة والتانيه

[wesammm]

يا جماعة الخير انا فعلا خلط البوتاسيوم مع الكالسيوم النتيجه كانت صفار في البصل تاني يوم مش متأكد انه بسب الخلط او بسب اني زودت نسبة الكالسيوم حاليا هل يجوز خلط البوتاسيوم مع الفسفور مع الماده السامه

[الابلج]

لا يجوز اطلاقا خلط الكالسيوم مع اي سماد آخر او احماض امينية او مبيدات سواء فسفورية او بيروثرودية او نحاسية او كربماتية .
ولا يرش الكالسيوم الا منفردا ً لسرعة ارتباطه مع اي من المركبات أو العناصر المخلوطة معه ويكون أملاح ضارة غير ذائبة وغير مفيدة للنبات .

[wesammm]

دائما معطاء اخي الابلج ربنا يجزيك كل خير

[romero_12345]

اولا احيي كل من شارك في هذا الموضوع وبخص بالذكر الاخ الابلج
وطبعا لا استطيع اني اقدر انكر مواضيعه الممتازة واللي ساعدتني في المجال وربنا يجازيه كل خير
ثانيا انا بعتذر اني ماقدرتش ادخل واشارك في الموضوع بس ده عشان ظروف العمل
ثالثا انا بعترف ان الاسلوب خاني في الكلام بس حسيت لما شفت الجملة دي ( ثم انت عارف البيليز اللي قالك عليه الأخ الفاضل ( مستشارك الرسمي ) بكام .....؟؟؟؟

حسيت ان المستشار الرسمي ده عمل جناية
المهم يا اخ ابلج من غير عتاب ولا حاجة انت راجل مجهودك معروف للجميع ومش محتاج كلام ومواضيعك تشهدلك
بس القصة فعلا ان الواحد مابيصدق يلاقي مبيد مظبوط في السوق اللي احنا فيه ده وانت اكتر واحد تعرف الكلام ده
علي فكرة انا تاجر مبيدات برضه
المبيدات فعلا فيها مغشوشة مش متقلدة وبطريقة مش ظريفة بصراحة
المهم بشكر كل اللي شارك في الموضوع ده واللي جاب سيرتي بالخير وبغير الخير

سؤال للاخ وسام

انت بتقول انت جربت الكبرتوب ؟ انا فعلا محتاج حد جربه عشان عايز اعرف نتايجه علي ارض الواقع وياريت تقولي بامانة او اي حد تاني جربه . ولو حد يعرف تليفون حد في شركة شوري ياريت بعد اذنه يبعتهولي

اسف علي الاطاله

السلام عليكم ورحمة الله وبركاته

[الابلج]

أخي / romero
اهلا بك ، أنا في الحقيقة واسع الصدر جدا ، بل وأحب من يبادلني الرأي وأن يوضح لي اي خطأ ممكن ان اكون قد وقعت به ، ( خيركم من اهدى إلي عيوبي ) .
وعلى فكرة ... والله لم أقصد بالمرة الاستهزاء على من قدم إليه النصيحة ، ولكن أنا أول مرة أسمع أن مبيد البيليز يمكن استخدامه في البصل ، لأن أمراض البصل لاتحتاج لمثل هذه التكلفة بل على العكس تماماً فإن شريحة المبيدات الفعالة جدا على ذلك المحصول كثيرة ومضمونه ومؤثره .
وبما أنك زميل مهنه ايضاً ، إذا فإني احب جداً ان نتبادل الخبرات بشكل عملي فعال ، فاسأل ماشئت عن أي نوع مبيد ، ومصدره ، ومواده الفعالة ، والثغرات التي يمكن ان تكتشف منها شكل العبوة المغشوشة من المقلدة . وبإذن الله غداً سأرفق لك صورتين لأحد وسائل الغش التجاري .
أما بالنسية لشركة شورى فإليك الموقع الرسمي لها :

http://www.shouragroup.com/the_project/a_home.asp


وغداً بإذن الله ارسل لك هاتف أحد زملائي والذي يعمل بالمكتب العلمي بها وكذلك هاتف أحد مديري التسويق .
وربنا يديم المعروف وشكراً