بسم الله الرحمن الرحيم
اولا الف اهلا وسهلا بكل الاعضاء اللي نوروا الموضوع بوجودهم
تلبية لرغبة أستاذنا ووالدنا العزيز أستاذ جمال و لرغبتي انا نفسي في إني احكي موضوع خطوبتي طبعا اللي كان احد ساباب انشغالي عن المنتدى الفتره اللي فاتت
ححكيلكم الموضوع تم ازاي وادعوا لي يكمل على خير ان شاء الله العلي القدير
في نقطة عايزه اوضحها علشان في ناس في عيلتنا استغربوا وقالوا انتي مستعجله على ايه؟ انتي لسه خارجه من تجربه واكيد ليها اثر علي قرارك
انا في زواجي الاولاني اللي استمر 3 سنين او اكتر قليلا , من بعد سنه تقريبا وانا علاقتي بزوجي وقتها شبه منتهيه
لا بنتكلم مع بعض ولا في حب ولا تفاهم ولا أي شيء
كنت اصلا ناويه اني انفصل عنه في رمضان اللي قبل اللي فات
لولا رجع لي مره بخبر انه جايله عقدعمل في سلطنه عمان ولسه بيفكر
في حاجه والله فعلا حصلت مش عارفه حتصدقوها ولا لأ انما انا طول شهر رمضان كنت بدعي بدعوتين وقت الفطار اول حاجه ان القط الكبير اللي عندي ربنا يشفيه لأنه كان مريض وبطل ياكل وكان حيموت والدعاء التاني ان ربنا يرزق زوجي بأي سفريه بحيث انه يبعد عني وفي نفس الوقت مبقاش اسمي مطلقة وجايز لما يسافر ويشتغل ربنا يهديه ويهديني ونرجع علاقتنا تاني زي الاول
ووالله فعلا دول الدعوتين اللي رمضان انتهى وهما متحققين الحمد لله
وموضوع السفر ده هو اللي صبرني سنه كمان عليه وسافر يوم 24-1-2011 قبل الثوره بيوم واحد
وقعد هناك 4 شهور ورجع يشتكي ومرضيش يسافر تاني ولحد النهارده مش عارفه سبب رجوعه من السفر كل اللي قاله ان نظام الشغل مش عاجبه!
المهم رجع من شهر 5 لحد شهر 12 واحنا في تباعد دائم لأنه بدأ يهمل اكتر من الاول وسفره لأسكندريه بقى يومين اسبوعيا بحجج تافهه جدا المهم طبعا مش ده كل شيء انا بحكي اللي ينفع احكيه بس
اللي عايزه اوصله ان من الاساس من بعد سنه او اقل من زواجي عمري ماحسيت اني زوجه وليا بيت وزوج ومستقره في حياتي
دايما كانت حياتي معاه مهدده حتى لو ربنا هداه شويه وبقى كويس كنت ببقى من جوايا مش سعيده لأن خايفه يرجع زي الاول وكان بيحصل فعلا
ماعلينا من اللي فات والله مانا فارق معايا حاجه منه خالص كل اللي مزعلني حاليا في الموضوع ده ان صعبان عليا انسان كان عنده حاجات كتير حلوه ومتعبش في اي حاجه فيها ومع ذلك اتبطر واتكبر على نعم ربنا وفي الاخر عايش وحيد ومحدش بيفكر فيه
والله بجد بدعي ربنا يهديه ويصلح حاله بس بعيدا عني خاااااااااااااااالص ومن قلبي سامحته علشان يوم القيامه مايجيش شايل ذنبي كفايه عليه اللي هوا شايله
المهم ان تكون النقطه دي واضحه ان انا لا لسه شايله حاجه من تجربتي اللي فاتت
لا حلوه ولاوحشه خلاص هيا انتهت
وان كان سبب طول فتره جوازي لا حب ولا حاجه انما بس كنت بعمل اللي عليا لآخر لحظه علشان لا اندم على تقصير ولا حد يلومني ويقولي كنتي اصبري وطولي بالك
كفايه رغي لحد كده بعد الفطار ان شاء الله احكي بقى عن الجزء الحلو الجديد اللي يارب يكون زي مابتمناه
اقتباس
المشاركة الأصلية كتبت بواسطة مسكين
