لو حابب اساعد فى انك تعمل حديقة بسيطة وجميلة فى مصر وبسعر كويس جدا ممكن احكى واتكلم معاك بالبلدى من غير اسماء علمية ولا اى تعقيد لو عايز تزرع نجيل حدد مساحة مسطحك الاول شوفه تقريبا كام متر مربع وروح اقرب مشتل اطلب منه على قد المساحة وزيادة كذا متر مربع فوقهم هتلاقى سعر النجيل النضيف مثلا تلاتة جنيه ونص او اربعة غير تحميله وانصحك بنوع اسمه باسبوليم جزر البحر ده من احسن الانواع اللى انا بفضلها
المهم
خلصنا النجيل
وظبطنا مسطحنا حسب ما احسن صورة فى خيالنا بتقول
طبعا عايزين نكمل جمال الحديقة
لو عندك مكان وعايز تعمل اسوار مثلا جميلة انا هقولك ازاى احفر مكان السور اللى عايز تعمله خندق نص متر فى نص متر واملاه سماد بلدى ورمل مخلوطين واملاه مية وسيبه ويلا نروح المشتل نجيب اللى انت عايزه باسعار للنبات الواحد من نص جنيه لغاية 3 او اربعة جنيه بص يا سيدى عندك حاجة اسمها دورانتا مبرقشة لون ورقها جميل فى الاسوار مبرقش اخضر فى ابيض لو مش حابب فى هبسكس يعملك صور مزهر روعة بجميع الوان الازهار اللى تحبها احمر وردى موف مش عاجبك وعايز سور اجمل ارشحلك نبات اسمه تكومريا ازهاره جميلة ورقيقة جدا وهيديك سور روعة لو مش عايز الوان ازهار وعايز الوان اوراق عندك نبات اسمه كوكنسيرا ده جميل برضه لو عايز السور كله لونه اخضر بس ارشحلك ديدونيا او فيكس نتدا او بزروميا
زهقت من الاسوار
كل نبات قولته فى الاسوار سعره رخيص جدا فى مصر
نخش على احواض الزهور
هديك اسماء لزهور رخيصة وجميلة
اقحوان - جازانيا -خطمية - جارونيا -قرنفل - ونكا - شرانيا - شيح بابونج - بيتونا -
كل الحاجات دى هتلاقيها بتطلعلك بذرة تجدد منها او خلفات المهم مش هاتخلص من عندك واسعارها رخيصة جدا ممكن تلاقى النبات بجنيه او اقل لو الكلام عجب حد وعايزنى اكمل اشجار وشجيرات ونخل يقول بس عشان اكمل اصل حاسس دمى تقيل قوى عشان كده مش هاكمل
مواضيع مشابهة: