المشاركة الأصلية كتبت بواسطة بيت الخبره
الاخ المحترم
انا كان لى تجربه مماثله زمان وكانت مفيده جدا ,حيث انى افتتحت محل زهور مع شريك من اكثر من 12 سنه وكان فى دار المركبات وعلى فكره حققنا ارباح ممتازه بس كانت بتروح هباء فى تسديد الايجار المرتفع واجرة العامل الفنى حيث كان يتقاضى وقتها 25 او 30 جنيه فى اليوم وكان الايجار 2500 فى الشهر
مع العلم ان مكسب الزهور زى مكسب المخدرات بس لو بعت كل الزهور اللى بتوصلك او حتى نصها ولازم تعرف انك لازم تكون متواجد بمعرضك طول الوقت عشان تضمن عدم السرقه لانه الموجود بالمعرض ممكن يبيع زهور وانت مش هتعرف لان الزهور بتيجي بالربطه مثلا الورد البلدي الربطه فى حدود 100 ورده
اولا ليه ماتروحش لمحلات الورود اللى فى المنصوره وتحاول تعرف منهم تلفونات الموردين بس اكيد هتلاقى صعوبه شويه فى انهم يعطوك المعلومه
ثانيا : لو ما عرفتش منهم معلومات راقبهم وشوف الموردين عند وصولهم واتعرف عليهم بنفسك
ثالثا :واهم حاجه لازم تعرف زباينك وهم 1-الاخوه الاقباط حيث يستهلك الاقباط الزهور فى افراحهم واحزانهم يعنى تشوف تعدادهم عندك اد ايه
2-الطلبة الحبيبه وياريت لو تكون قرب الجامعه
3- زائري المستشفيات ودي ما تعتمدش عليهم اوي لان المصريين بيحبو يشتروا عصاير وشكولاته للمرضى اكتر م الورد
4- العرائس وقاعات الافراح والفنادق ودي هتحتاج منك دعاية وعلاقات وتشوف المشرفين على القاعات وتظبط امورك معاهم او تحاول تعمل تعاقدات للتوريد للفنادق بتورد مثلا ورده او وردتين بيوضعو على كل ترابيزه فى مطعم الفندق ودي بتبقى يوميا او بعض البنوك بتعمل كده بحيث يكون كل اسبوع تشكيلة ورد تروح لمكتب المدير و بعض العرائس بتحب تضع بوكيه صغير على كل ترابيزه وده ممكن يعمل معاك شغل مستمر احسن من المبيعات الفرديه طبعا غير البوكيهات الكبيره اللى بتوضع خلف العروسه ايضا
و بيع الورود له مواسم بيهدى فيها وخاصة الشتا والامتحانات وعلى العموم يارب اكون افدتك بس الحقيقه معرفش عناوين او تلفونات اى حد من الموردين بس عشان تبقى عارف معظمهم فلاحين عاديين جدا ما عدا طبعا الزهور الغاليه مثل الليليم ده بيبقى له مستوردين الا اذا اصبح بينتج فى مصر لانى تجربتى دى كانت لمدة 6 شهور فقط وطبعا اسعار الزهور كذلك بتتغير حسب المواسم
م هانى محمد البابلى
شكرا جدا جدا جدا بشمهندس هانى للمعلومات وانا قعد 18 ساعة بالمعرض إن شاء الله لانه هيكون مشروع الخاص ولن املك عمل غيره بس المشكلة مش عارف اجيب السورس منين اقصد الورد وحاولت عند كام محل ورد بس للاسف مافيش مساعدة علشان اعرف اسماء الشركات بتاعت التوريد بحيث اتقاعد معاها واخد البضاعة منها بالمنصورة فمحتار بصراحة لانه ده مشروع حياتى وشكرا للمعلومات الرائعة .
اقتباس