سؤال هام
انا اشتريت بذور جازانيا وكوكيا وونكا و(قرنفل ابيض واصفر بيقول انو بلدي) وسنانير وفلفل رومي (معرفش ايه العلاقه) وابصال ياسمين وزنبق واشتريت 10 كيلو بيتموس وزرعتهم كلهم (في قصاري منفصله طبعا ) في تاريخ 27/7/2011 في تربة البيتموس بس (حطيت التربه وبعدين البذور وبعدين طبقه خفيفه بيتموس تاني )ورشيتها ميه وبالنسبه للأبصال فصصت الزنبق وحطيتهم في تربة البيتموس حته من راسهم باينه وزيه الياسمين
في يوم 30/7/2011 بدأت أبصال الزنبق تخضر والحمد لله وكمان بصلة الياسمين بس للأسف اكتشفت أن بصلة الياسمين عيانه بدأت تطلع من عند البرعم اللي طلع زي عفن ابيض تحس انو ملزق ولقيت حشره شبه المن بس بيضه مزغبه المشكله انو ابصال الياسمين والزنبق كانو محطوطين جنب بعض عند بياع التقاوي خايفه يكونو الاتنين فيهم نفس المرض وكمان خايفه تكون الحشره دي اتنقلت لباقي الزرع وانا بزرعه او بعدين لانو انا حاطه الاصاري جنب بعض لو ينفع اعالج الموضوع ده من غير كيماويات لاني نفسي استخدم الياسمين في استعمالات المطبخ وهل زراعتي دي صحيحه من حيث التوقيت والاسلوب وهل هيه محتاجه تسميد وكمان انا بلكونتي مشمسه طول الوقت وانا هزرعهم في قصاري على سور البلكونه وهل ممكن ازرع نوعين اوتلاته منهم في قصريه واحده عشان يبقى المنظر جميل
مع العلم انا سالت البياع هوه البيتموس كفايه قال اه واداني البذور على انها زهور دايمه وقالي مش محتاجه اي تسميد او حاجه
انا طولت معلش وارجو الإفاده لاني نفسي ازرع نباتات خضره وصحيه ومنتعشه كده زي اللي بنشوفها في اليابان وكوريا وتقر عين اي حد ماشي وتحسن حالته النفسيه واي حد يبص عليها من جماها تخليه يعمل في بلكونته هوه كمان كده
وجزاكم الله خيرا
اقتباس