الأخت العزيزة امال
معليش انا ما اطلعت على استفسارك الا الليلة
أنا خريجة زراعة قسم تقانه حيوية الهندسة الوراثية جزء أساسي في عملنا
أنا أولا بحييك على رغبتك في دراسة زراعة ,, لمن تدخلي الجامعة حتصدمي بطلبة كتير دخلو زراعة على مضض ,, دخلتهم النسبة وحتلاقيهم كارهين زراعة وكارهين اليوم اللي جابهم الجامعة ,, للأسف دول بمثلو الأغلبية ودول هم اللي بيعطو الوجه السالب لزراعة ودول عادة بفشلو في الحياة ..
انت بتمثلي النموذج الجيد الأخر اللي دخل زراعة عن رغبة ومحبة واصرار على النجاح ,,عشان كدا انا بشجعك وبقول ليك سيري ورعاك الله ........................
أما فيما يخص الهندسة الوراثية فأنا بشجعك عليها لكن مقابل انك تضمني لي انك تكوني من المتفوقين عشان تلاقي الفرصة الصح في الحياة بعد التخرج....
مافي حاجة صعبة المسألة وما فيها انو انت حتاخدي جرعات مكثفة من المعرفة لأدق تفاصيل النبات أي على مستوى الخلية وفي الخلية على مستوى النواة والوراثة ,, ذاكري أول باول وحتجي يوم الامتاحن وانت حاسة انك جامدة
مش ساهلة ومش صعبة لكن سهل ممتنع
وبعدين التعليم الجامعي بفرقو عن المدرسي الجزء العملي فيه حيكون عندكم معامل من خلالها حتعرفي التلاعب بالجينات والهندسة الوراثية وصدقيني المعامل دي بروتوكولات زي برتوكولات الطبخ تدخلي المطبخ عندك خطوات دي زايد دي بتديكي دي وبالضبط هي دي الهندسة الوراثية خطوات موزونة ومحسوبة ودقيقة ممكن تنتجي نبات يديكي من فوق طماطم ومن تحت بطاطس ولا تحشوريلك بكتريا مسمة في النبات عشان تقتلك يرقات الفراش اللي بتتلف المحصول ولا تزرعيلك عنقود عنب كل عنبة فيه بلون ولا تزرعي نبات في مناطق الالغام لمن يتغير لونو تعرفي انو في هنا الغام والنبات ابطل مفعول اللغم
دي كلها تجارب اجريت في المعامل وأثبتت نجاحها وأصبحت محاصيل ذات أثر اقتصادي لبعض الدول دي مش خطارف بتخيلها دي ثورة العلم الان واحنا لازم نجاري الثورة دي....
((((((((((((((((((((((((((*)))))))) ))))))))))))))))))
عشان كدا انا بشجعك بشدة انك تدرسي الهندسة الوراثية وتتفوقي فيها عشان تلاقي فرصة لخدمة بلدك وامتك
وما تخافي من الصعوبة كل الكليات دي حتى كلية اداب بتدرس باعطاء معلومات مكثفة ومعقدة اللي براجعها اول بأول بمر واللي بالعب بطب
والهندسة الوراثية علم أجنبي وأنا بأكد لك انو الاجانب و الامركان مش اذكى مننا بتاتا
حاجة أخيرة عايزة اقولك هي اني دخلت الجامعة لحدت ماتخرجت مارسبت في مادة والمذاكرة اللي ذاكرتها في امتحان الشهادة الثانوية لحدت ما اتخرجت ماذاكرتها في الجامعة ...... فشوفي انتي بقا وقيسي
وبالتوفيق
مودتي