هى فعلا حاجات قديمة جدا أنا معاك فى دا لكن
ماتظلمش أستاذ الجامعة لأنة بيحكمة امكانياته المحدودة جد واللى كلنا عارفينها
تقدر تقولى استاذ الجامعة دا مرتبه كام بعد سنين عمرة اللى ضاعت دى كلها
اسمح لى أقول انها ضاعت فعلا لأنة لما تكون هى دى النتيجة اننا فعلا مش عارفين نتعامل مع الفلاح البسيط بخبرتة الميدانية زى مابتقول يبقى التعليم مالوش لزمة
تقدر تقولى كمان ميزانية البحث العلمى فى مصر كام أو حتى فى أى دولة عربية تانية غير مصر
وميزانية أى حاجة تانية وقارن بينهم
حتلاقى مجموعة أصفار وأرقام مهولة بنسمعها فى المقابل مفيش ميزانية للبحث العلمى
ادخل أى معمل فى أى كلية عملية بص على البنشات وانت تشوف الاجابة محطوطة قدامك
وشوف من امتى ما اتغيرش فية ميكروسكوب مثلا ودا أبسط حاجة فى المعمل
بلاش كدا
قولى رسوم الدراسة اللى زادت 3 أضعاف تقريبا وف سنة واحدة دا معناه اية
طبعا معناها اننا بنشجع البحث العلمى
أه انا معاك
معناه كمان اننا ف دول متحضرة
عادلة مش بتحب تظلم حد
بتدى كل مواطن حقة بالتمام والكمال
أسأل كام مهندس زراعى بيشتغل أصلا ؟
وكام منهم بيشتغل فى مجالة؟
لما تقرا الاجابة على وش أى واحد قاعد مش لاقى شغل
حتعرف اية الاسباب
لما تلاقى كل اللى عايز مهندس زراعى يدير له مزرعتة يكون صاحب خبرة
حتعرف الاجابة
حيجيبها منين المسكين وهو كان لاقى شغل اساسا عشان يأخد منه الخبرة
حاجات كتير وأسباب كتير
أهمها طبعا فساد الحكم
وعلى رأى المثل
إذا كان رب البيت بالدف ضارب فشيمة أهل البيت الرقص
منين الدكتور حيطور مناهج وهو اساسا بيشتغل شغلة واتنين عشان يوفر احتياجات بيته
منين وهو نفسة بيروح الجامعة فى الاتوبيس (ماعدا طبعا ناس معينة دى خارج حساباتنا احنا بنتكلم على عامة الشعب)
صدقنى كنت بأقول زيك كدا
لكن لما سجلت ماجستير وقاعدة بقالى 3 سنين دلوقت مش قادرة أعمل أى حاجة بقيت اتكسف أقول لحد انى مسجلة
لانة حيسألنى حتخلصى امتى وانا مش عارفة ارد اقول اية
دا ابسط سؤال ممكن تسمعة
دا غير طبعا
حتعملى بيها اية الشهادة دى بعد كل التعب والمصاريف اللى انتى بتصرفيها دى
وغيرة وغيرة
انت فتحت موضوع مهم جدا وحساس جدا جدا
ياريت تلاقى أجابة لأسئلتك
ياريت نقدر نحل مشاكلنا دى من غير مانعمل مشاكل اكبر منها
ياريت ياريت ياريت
بس الأمر مش بايدينا
نقول اية
"لله الأمر من قبل ومن بعد"