تعالو نتمنى
ياترى نتمنى اية ولمين ؟
أتمنى طبعا الخير لكل المسلمين
وأنه ربنا يرجع لنا أقصانا أولى القبلتين وثالث الحرمين الشريفين ويرزقنا صلاة فية قبل الممات
طيب نتمنى لنفسنا اية الاول؟
أتمنى انى الاقى شغل مناسب ليا ويكون العائد المادى منه يكفى انى اكمل دراستى للماجستير إن شاء الله
ياترى اية احلامنا اللى حققناها ؟
إنى حبيت الكلية اللى أن درست فيها بعد ماكنت مش طايقاها أى نعم هو جه متأخر شوية بس الحمد لله على كل حال
وكمان إنى بقالى أصدقاء وناس فعلا أثق فيهم بعد ماكنت انطوائية جدا وبخاف اتعامل مع الناس
واية احلامنا اللى ماحققناهاش ؟
انى ادخل كلية الهندسة
واية السبب اننا ماحققناهاش لحد دلوقت؟
مش حأقول الإجابة المعتادة انه التنسيق لكن لا التنسيق مالوش ذنب طبعا
لكن السبب الحقيقى انى ماكنتش أعرف ازاى أذاكر صح عشان أوصل للى أنا عايزاة
ويمكن الظروف اللى حواليا هى كمان كانت من ضمن الأسباب
بس أولا وأخيرا هو النصيب
واية اللى لسة بنحلم نحققة؟
سواء لينا أو للأخرين
كان ليا حلم جميل اوى بجد كان نفسى احققة بس طبعا هو أشبة بالمستحيل ان ماكانش هو المستحيل فعلا فى ظروفنا دى
كنت بأحلم يكون عندى قرية كبيرة أشبة بكلية الزراعة فيها كل التخصصات ونشتغل فيها أنا وصحابى وزملائى كل واحد فى تخصصه بحيث ان القرية دى يكون عندها اكتفاء ذاتى فى كل حاجة يعنى مش محتاجين أساسا اننا نتعامل مع العالم الخارجى ولو اتعاملنا يبقى نديهم مش ناخد منهم
والسؤال الأخير ياترى اية الحلم اللى بنتمنى انه مايتحققش أبدا
سواء حلمنا بية فى النوم أو فى اليقظة
كنت دايما أشوف فى منامى انى تايهة فى مكان ما اعرفوش وانه فية اشباح بتطاردنى
طبعا ماحدش يتمنى لنفسة انه يتوة لكن نتمنى نكون عارفين طريقنا كويس اللى يوصلنا لأهدافنا
اللهم صلى على سيدنا محمد فى الأولين وصلى على سيدنا محمد فى الآخرين وصلى على سيدنا محمد فى الملأ الأعلى إلى يوم الدين.....
آمييييييين
تحياتى للجميع