بسم الله الرحمن الرحيم
الاخوة الاعزاء ،،
كنت بدأت موضوع الزراعه ده من حوالى اربع شهور ولان معنديش ارض او سطح او حتى بلكونه فزرعت فى اصص معلقه على الشبابيك ، صرفت فلوس ومجهود وكله ضااااااع
فلو تكرمتم عاوز مساعدتكم فى الموضوع ده
هاحكلكم اللى عملته من البدايه الى الان
زى ماقولتلكم معنديش بلكونات فجيبت الحداد وعملى حاجه كده زى الكوابيل الحديد بره شبابيك البيت كله وينحط عليهم الاصص المستطيله البنى الكبيرة حوالى 14 اصيص غير المدورين ،
جيبت شيكاره بيتموس كبيره الالمانى وشكارتين سماد ، وحطيت الاتنين على بعض تقريباً بنسبه 1/1 ورمل مبانى تقريباً جردل وطبعاً غسلت الرمل وخلطهم وبدأت زراعه الاتى طبعاً كله من البذور
يوسفى
كيوى
تفاح
مانجو
جرجير
فلفل رومى وفلفل حامى
فجل
بقدونس
طماطم
،
وكانت النتيجه هى
كل البذور انبتت وزى الفل
اليوسفى بعد 3شهور وصل ل5 سنتى تقريباً
وبعد كده ربنا افتكره
الكيوى بعد مانبت وبتاع اسبوع من التنبيت ربنا ريحه وريحنا
الوحيد من الفواكه واللى شغال زى الفل هو المانجو زرعته من يجى شهرين وتقريبا كل البذور نبتت فرعين او تلاته ومورقه وزى الفل الى الان
الجرجير والفجل والطماطم والفلفل دول بقى طلعوا عين اللى خلفونى
اول مره زرعتهم نبتوا وزى الفل ولما بدأ يظهر الاوراق لهم العصافير حبت تعمل معايا الواجب
واكلت الورق اللى بينبت وسايبن الفروع علشان يغيظونى وباظت اول زرعه ،
زرعت تانى مره وعملت حساب ولاد التيييييت العصافير وحطيت لهم خيال المأته الحلو ده وكمان سي ديهات متعلقه على خيط
يسكتوا لالالالا ازاى
ومين يغيظ العبد لله
بردوا أكلوا الورق وسابولى الفروع وكل ماشوف المنظر ده احس ان العصافير واقفه على الشجره اللى فى الشارع وبيتريقوا عليا ومطلعينلى لسانهم
قوووووم ايه بقى انا سخنت والعمليه كبرت فى دماغى ويا انا يا هما
وبعد تفكير جبت شبكه صيد عموله ضيقه متعديش العصافير وعلى مقاس الشباك وعلقت الشبكه من فوق الشباك ومدلدله على الاصص
واخيراً طلعت لسانى لولاد التيييت وحاسس انهم دلوقتى اقروا بهزيمتهم
المهم زرعت تااااني
الطماطم قعدت بتاع شهر ونص من اول الانبات ووصل طول الساق بتاع 3سنتى وطلع السر الالهى
الفجل بدأ يورور ويبان له ملامح ووصل بتاع 10 سنتى وكله مره واحده دبل وزى مايكون بيمر بأزمه قلبيه وطلعت روحه
والجرجير
هو اللى مطول معايا بقاله دلوقتى شهرين ووصل ل 10 سنتى يعنى نمو البعيد واقف وبين كل 5او 6 فروع منه تلاقى 5او6 فروع عندهم نفس السكته القلبيه اللى جت للفجل
( حبيت احط صوره للجرجير الحزين ،المنتدى بيطلعلى رساله انى وصلت للحد المسموح من الكيلو بايت)
،،،
معلش طولت عليكم بس مقهوووووور على الوقت والتعب اللى تعبته
الأسئله بقى ؛ليه الزرع بيموت وليه اللى بيعيش نموه واقف واشمعنى المانجو هى بس اللى فرحانه وعماله تزهزه
اللى بشك فيه ان التربه مش متوازنه
بالنسبه للرى كنت بسقى تقريباً كل 3 ايام
بالنسبه للشمس ،بتكون مباشره من الساعه اتنين الى خمسه تقريباً
مواضيع مشابهة: