هذا موضوع (قديم) فى مدونتى و لكنه يستحق إعادة النشر فى هذه الأيام.
كثرت أخيرا الأعلانات عن أراضى زراعية بأسعار خياليه من عينة 1000 جنيه الفدان الى 5000 جنيه و أحيانا أكثر قليلا و الكل يدعى أنه الأفضل و الأرخص و و و ............!!
نصيحتى من واقع خبرتى العمليه هى كالتالى:
1. الورق - الورق - ثم الورق: أتصل بصاحب الأعلان و أسأل عن مستند الملكية الخاص به وأحصل على صورة ضوئيه منه للكشف عليه بالهيئة العامة لمشروعات التعمير و التنمية الزراعية و هى الجهة المالكة للأراضى الصحراوية بمصر، أى أقوال من نوع:
الأوراق لدى المحامى
الأوراق مع صاحب الشركة و لا يتم خروجها الا بعد دفع العربون
جارى أستخراج الموافقات بالهيئة
أصل الأرض مقدم عنها بأسم شركة "(أى حاجه) للأستصلاح الزراعى" و سنعطى لك عقد بيع من الشركة
تم سداد رسم المعاينة على الأرض و جارى الأستصلاح
كل هذه الأقوال تعنى بالبلدى أن الأرض وضع يد و أن من يبيع لا يمتلك و الموضوع كله به قدر كبير من الخطورة على أموالك.
2. اذا حدث و وجدت أوراق للأرض, خذ صورة ضوئية منها و هذا حقك لأنك ستدفع أموالا و لا تتنازل عن ذلك تحت أى بند من نوع:
أصل أبن خالتى شارى عندهم و بيقول أنهم ناس كويسين
الراجل شكله محترم و الشركة فى مكان شيك جدا (غالبا سيكون أيجار مفروش)
أصل أنا بصراحة مش هاخد غير خمسه فدان و الكمية صغيرة و مكسوف أقول له هات أوراق الشركة علشان مساحة تافهة زى دى
المثل البلدى بيقول (اللى يتكسف من بنت عمه ما يجبش منها عيال) يعنى دى تحويشة العمر و لوضاعت حتبقى انت الملوم لأنك ما أخدتش بالأسباب.
3. بعد حصولك على الورق أعطيه لمحامى ليكشف لك عنه و اذا كان سليم أتصل بالشركة و حدد موعد لزيارة الموقع على الطبيعة.
4. عندما تصل للموقع خذ نظره شامله لما حولك 360 درجة فأذا وجدت زراعات و لو بعيده و وجدت مدن أو تجمعات سكنيه أو ما شابه و وجدت الأشجار أو الزراعات نضره فهذا المكان سيكون به خير بأذن الله، اما اذا وجدت صحراء قاحله حولك من كل جانب و وجدت من يقول لك عينة من الآتى:
أصل المنطقة دى لسه جديدة و ما حدش واخد باله منها.
أصل كل الناس اللى شاريه واخده مساحات كبيره جدا و لسه ما زرعتشى.
ده فلان و علان واخد جنبك و المستشار مش عارف منين و اللواء مين لسه شاريين أول أمبارح.
أعرف أنك مش كريستوفر كولومبس و أن الأرض دى مش أمريكا اللى راح تكتشفها و أن كتير قبلك عدوا من هنا و ضيعوا فلوسهم اما لأن الأرض مالحه أو المياة الجوفية مالحه أو الأرض تبع الجيش أو الآثار أو خلافه.
فى هذه الحاله أتركه و أرجع و لو كنت بعربيتك ما ترجعهوش معاك!!
مواضيع مشابهة: