السلام عليكم اخواني وخواتي
حبيت اخلي كل الي اعرفة وعن دراسة وتجربة شخصية لكل من يستفاد في هذا المنتدى وبالصور انشاء الله وانا حاضر لاي سوال او استفسار
راح اخلي الموضوع شبه مختصر حتى لايمل احد ولا يحس انو موضوع الزراعة صعب و مو ممكن اي احد يسوي ويدوخ نفسه
راح اجي للموضوع من البداية
اول شي التربة
طبعا التربة سواء كانت مالحة وقلوية او متصلبة ويضن البعض انو مو ممكن ان تثمر او غير صالحه للزراعه فهو غلطان, كل ما عليك عمل الاتي بالنسبة للتربة
1- عليك اولا ان تحفر مسافة على الاقل 10 سم من التربة وتنقلها خارج الحديقة وتخلي مكان التربة الي حفرتها بتيموس وسماد حيواني بعد خلطهما جيدا( يعني كل كيلو بتموس وياه كيلو سماد حيواني اي النبسة واحد الى واحد) والاثنين رخيصات ومتوفرات واعتقد الكل يعرف شنو البيتموس والسماد الحيواني لان بصراحه بالمناطق الحاره والمغبرة والجافة ماينجح الا البتموس. بعد ماتحفر التربة تقلب التربة الي تحت قبل لاتفرش البتيموس وبعدين تخلي البيتموس والسماد المخلوطين حتى تكون الارض شبه جيده للتصريف المائي وغنية بالمواد العضوية الي يحتاجها النبات وبالتالي تكوين مسامات جيده للتربة . هاي كل القصة بالنسبة للتربة. شوف الصوره
2- بعد ماخلصت من التربة تجي تزرع اي شي تريد وعلى النحو الاتي
الثيل او النجيل او الحشيش : تكدر تزرع بذور وتكدر تزرع قطع
زراعة البذور هم سهله وبسيطه: تقلب البتيموس الي انته خليته مكان التربة القديمه وتسوي شقوق او حفر او بس تقلبة وتنثر البذور بعمق مسافة يعني 1 سم او اقل بشوي وبعدين تخلي طبقة رقيقة هم بتموس وبعدين ادوس المكان بخشبة او اي شي مربع عندك بالبيت والدوس اي الضغط على البيتموس فد شي بسيط ورقيق حتى يثبت مكان البذور وماتنجرف بالري. طبعا البذور لازم تنسقي بالماء يوميا ولازم مياه غزيره شبيه فيضان بس دير بالك تخلي الماء جاري حتى لاتنجرف البذور: يعني استعمل الرش بس بكثره يوميا مره واحده وانا افضل ومن الاوجب الري ليلا او الصباح الباكر جدا لان الري صباحا بوقت متاخر او ظهرا راح يأدي الى جفاف التربة بسرعة وعدم استفاده النبات من الماء وبالتالي طفح الملوحه المتبقية من الماء المتبخر. وطبعا الحشيش او الثيل عادي تسقي بماء الاسالة العادي ومايريد ماء حلو او نقي والنتيجه بعد ثلاث او اربع اسابيع
زراعة القطع من الحشيش النجيل او الثيل: هم بسيطه كل ماعليك انوتساوي الارض المفروشة بالبتموس و تحط قطع الثيل بالمكان الي تريده وتغرقها بالماء وتضغط على القطع بشكل بسيط حتى تتساوى مع الارض وتثبت الجذور ومن اقول تغرها بالماء فانا اعنيها بكل معنى الكلمة يعني لازم تفيض من الماء وتكرر هاي العملية يوميا ولمدة اسبوع بعدين تخفف الكمية بين يوم ويوم بس ري بسيط يعني رش طبيعي
3- زراعة الشتلات : طبعا لازم تسوي حفرة ضعف حجم الشتلة طول وعرض يعني الحفره اعرض من الشتلة واعمق من طول الشتلة بمره . اتخلي بتيموس بعمق الحفره لحد ماتصير الشتلة بمستوى الارض بعدين تخلي الشتلة وتخلي هم بتموس داير او حول الشتلة وتضغط بيدك ضغط خفيف حول الشتلة ولاتضغط على الشتلة من فوق بس حول الشتلة. تسقي الشتلة بالماء مباشرة . والافضل انو السقي بماء حلو مرتين بالاسبوع وباقي الايام عادي تسقيها بماء مالح .
4- زراعة الورود
طبعا زراعة الورود شوي يرادلها مدارات لان تعرفون الورد رقيق وبصراحة بكل المناطق والدول يراد مراعات الورود والعناية بها
اما بالنسبة النا فنسوي الاتي
اذا تحب تزرع الورود بالحديقة اي تنقلها من الشتلات الى الارض فهم تسوي نفس خطوات زراعة اي شتلة اخرى لكن خلي ابالك الورد مايحب شمس قوية والحل انو تسويلة مضلة بسيطه وماتكلف اي شي وهي عبارة عن نسيج اخضر رخيص الثمن يباع بالمشاتل والاماكن والمحلات الزراعية وهي تحمي الورود من الشمس الحارقة والصوره خي دليل. حاول تزرعها بين الاشجار او اي مكان تشوفه شبه بارد وتوصل الشمس اليه قليلا.
طبعا خلف الستارة ملكة الليل وانواع اخرى من الورود
الري : يوميا صباحا او مساءا لان الجو حار عدنا بالصيف اما بالشتاء فعادي مرتين او 3 بالاسبوع وهاي الطريقة مالت الري نفس الشي بالنسبة لباقي الشتلات مثل الورود ومن اهم الاشياء يااخواني ري وسقي الزهور بالماء الحلو وليس ماء مالح او على الاقل مره ماء مالح ومره ماء حلو واذا شفت الاوراق تصير صفره فاستعمل فقط ماء حلو صالح للشرب
السماد :طبعا تسميد هم بسيط وهو مره وحده بالاسبوع واستعمل NPK وهو متوفر بكل مكان سماد كيماوي بقدار ملعقة شاي صغيره توضع حول الشتلة كل اسبوع والري مباشرة بعد التسميد.
اكو امور بسيطه اخرى يمكن تفيدكم
1- حاول تقلب التربة بالشهر مره يعني فد شي بسيط تقلب التربة الي على الشتلة
2- اعمل دوائر صغيره حول الشتلات حتى من تسقيها ماء مايروح الماء لغير مكان وهم المنظر يصير جميل
3- دائما شيل الاوراق المتساقطه او اشياء غير مرغوب بيها من الزرع والشتلات
4- حاول انو تخلي اوراق النباتات نظيفه من الغبار يعني تغسلها او تمسحها برقة حتى لاتسد مسامات الاوراق لان الجو مغبر بهشكل دول وخصوصا احنا بجنوب العراق
بس والله يااخوان كانت الحديقة مالتي صحراء والتربة مصلبة بس الحمد لله بديت بديها والامور زينة وكشي ماشي تمام وبدى الخضار والورد وانشاء الله مستمر
5- اسناد النباتات التى تحتاج الى دعامات خشبية تساعد النبات على الوقوف والنمو بصوره طبيعية
انشاء الله الموضوع مستمر ومتجدد واي شي انا حاضر
تقبلو تحياتي
مواضيع مشابهة: