الى كل اخوانى فى المنتدى
السلام عليكم جميعا
سامحونى على العنوان بس فعلا الكل بيستهبلنا وبيعروضوا علينا رواتب هبله زى مانكون ولاد البطه السوداء
دعوتى اوجهها الى اصحاب الخبرات الضعيفه لكى يزدادوا خبرة والى اصحاب الخبرات العاليه لكى يستذكروا ويذكروا
عاوزين نحط شوية خطوات عمليه لرفع خبرة المهندس الزراعى او مهندس الرى عشان سعره يزيد فى السوق
بدال ما هو الخمسه بقرش كده (سامحونى يعنى انا زى اخوكم)
المهم انا مثلا بشتغل مهندس رى فى مجال اللاند سكيب وساعات بشتغل مهندس لاند سكيب
وكان سعرى فى الارض
عملت ايه بقى..........
اولا رفعت مستوايا فى الانجليزى قوى
ثانيا احترفت برنامج الاوتوكاد وداخل على الفوتو شوب
ثالثا اشتغلت بايدى فنى تركيب مواسير
رابعا ذاكرات مراجع اجنبيه فى تصميم شبكات الرى من شركات كبيره
خامسا عملت علاقات مع مهندسين كبار ومع فلاحين صغار وبتعمل من كله
سادسا عملت تصميمات بايدى لمشاريع كتيره على الكومبيوتر بتاعى
ثامنا سافرت طبعا بره مصر ودى اهم نقطه
تاسعا اتعلمت السواقه ومعايا رخصة قيادة اماراتى
النتيجه ان الراتب دلوقتى كويس والحمد لله وخبرتى عاليه
المهم انا مش بحكيلكم قصة ابوزيد ولا بعرفكم مغامرات حسام فتحى لا والله
انا بس عاوز اعمل دعوه فى المنتدى للتدريب العملى على شغل الشركات الكبيره واللى عنده معلومه يقولها للتانى
انا قلتلكم الخطوات اللى تحطكم على اول الطريق
بعد ما نعملها
نبدا بقى ننفذ مشاريع
طيب اى حد عند مشروع يعرضه فى المنتدى ونشترك جميعا فى تصميمه وتبادل التصاميم
ونشوف احسن تصميم وننتقد بعض باسلوب كويس عشان نتعلم
ونخلص مشروع وندخل على التانى وكده نرفع خبرة بعض
وانا بقترح للاخوه المراقبين اننا نعمل منتدى فرعى يكون اسمه التدريب العملى ونشوف بقى مشاريع كبيره ونقب على وش الدنيا
بدال ماحنا قاعدين نندب حظنا زى الولايا
والله انا اعرف مهندسين رى فى الامارات راتبهم معدى عشرين الف درهم
انا بعتبر نفسى متوسط الخبره والدخل كمان او فوق المتوسط شويه
المهم اتمنى احصل على موافقه ورد من اللى حابب فكرة التدريب العملى ده
واى حد عنده تعليق على الخطوات اللى قلتها فى الاول عن مشروع كفاحى يقولى عادى
اشكركم جميعا
اخوكم المهندس المطحون/ حسام فتحى
ثانك يو
مواضيع مشابهة: