قصيدة عبدالعاطي (عبد الرحمن الأبنودي)

[sabry_kebeish]

السلام عليكم ورحمة الله وبركاته
نقدم اليكم قصيدة عبدالعاطي للشاعر الكبير الأستاز عبدالرحمن الأبنودي حفظه الله
التي كتبها في وفاة عبدالعاطي صائد الدبابات ومن أبطال حرب أكتوبر ( تدمير 26 دبابه للعدو وأسر العقيد عساف ياجوري). فليرحمه الله وشهدءانا جميعا.


اكشف غطا وجهك ومزع القناع
بلا حكومة . بلا حكومة
بى بطولة بلا بتاع
ياأسمر يأبو القلب الحديد
ياللي واجهت الموت ... في كل اتساع
ياأسمر يأبو الوجه العنيد
يا مصري ... ولحد النخاع
كله طلع كلام يا خال !!
والحال ..رجع تاني حال
أتاري الحرام..... هوه الحلال
وأتاري الهدى هوه الضلال
شموا نفسهم من جديد .
والمرة دي ..
بدمك أنت يا بطل .... مع الأسف
وبعجنة اللحم اللي تتسمى الشهيد
ويعملوها عيد بليد
تعرفشيه غير م الصحف .
واعترف ....
العيد بييجي ...
لاجل ما تموت من جديد
ولو ان موتك ريح بتغلب الرياح
لكنه ما حركش ليه أسن الحياه؟
ويا صاحبي ....
ما حركش ليه ألم الجراح؟
راح اللي راح
فلا انتظار ولا أمل
الحرب خلصت يابطل
والفرحة هبت في الوطن ياصاحبي
من كل اتجاه
وزي ما قالوا: طلع نور الصباح
ورفرف العلم العظيم العالي
على كل الجباه
لكنه...
ليه من غير حياه؟
والنصر ليه على رقاب كل اللي عملوه
اتكى؟
وليه في أرض المعركه
نسينا كل اللي بلغناه
بالمعاناه
والعرق وبالفخار ..وبالبكا
لما يا صاحبي ع الحلم اللي ضاع
ونصرك اللي راح وما عادلوش شهود
وما عادش داخل الحدود
غير اللي سمسر
واللي قرقر
واللي وفر ... واللي باع
****


اللي هوى الوطن .....هوى


بالعشق ولع وانكوى



من قبل ما يفتح ..... ذوى


يا أحلا أبناء الوطن

نرحل عليل......... بلا دوا

ترحل وحيد مجهول ...حزين
نرحل سوا



****
نرحل سوا. أنا وانت والوطن الحبيب


ونسيبها للوطن الغريب

نسيبها للوطن المريب

لديب .. بيحرس الجياع
والوهم اذا كشكش

..
بيزداد اتساع


وانت العريس اللي بنيت المجد

بايديك الجمال

وبقيت دريس طاو في الخيال
وكئن حربك النبيله
لعبه لعبوها العيال





لعبوها ع الساكت


اتمرمغت الصفحة اللي فيها اسمك

حدوته
...!


وسط الحواديت تاهت


الاسم مشطوب

والتاريخ ....باهت

مافضلشي منه شيء يا عبد العاطي
لم العو دباباته بعيد عن سينا
نسونا.............. فنسينا
والاسم
كان لازم في سكة الخيانه
يتردم
واللي كتب عنك ندم
واللي وقف جنبك ندم
اضطر يفضح لعبة التبديد
وحاصروه بالوصم والتهديد
صبح الشريف موصوم
هوه الشريف اللي تمللي يتوصم
وبقى السليم مجزوم
يستعملوا وياه ياخال





لغة الجزم


وبقى الجبان صنديد

فارحل حزين مظلوم

ارحل سفيه موصوم
ارحل مريض ساكت
ارحل الى أبعد بعيد



*********
وللقصيدة جزء أخر نكمله المرده القادمه انشاء الله

[sabry_kebeish]

السلام عليكم ورحمة الله وبركاته
نقدم اليكم الجزء الثاني من قصيدة عبد العاطي للشاعر الكبير عبد الرحمن الأبنودي.



مصر المهيبه بتنحدر للواطي

هل كنت تتخيل في يوم

السرعة دي في الموت يا عبد العاطي
حتى وانت . قصاد صفوف الدبابات ؟
سامحني أنا ماعرفش كام عندك
من الأولاد وم البنات

.
هل كنت تتخيل خيانة الوطن؟


!
هل كنت تتخيل عبير هذا الزمن؟


!


وهو صاعد للعلا نتن..؟


!


وقول بحق
.


ان كان قلبك خاف

والأر بي جي



مسنود على الأكتاف

ساعة اغتيال عساف؟

وهل خطر ع البال ياعبد العاطي
ان الخيانه حتسكن الآتي؟




!
وان ملعوب لاتفاق ملعوب ؟

وان اكتوبر حيتباع ويا مصر؟

ــ الاتنين ــ في سوق العصر..؟
والمؤمنين



حيطردوا من صيغة المستقبل

ويصعد الخاطي ؟


!!


دلوقت ايه اللي مضيق

صدرك الوسيع؟

وبتفهم ازاي الفروق
بين اشترا الوطن الأسير
والبيع؟
النصر تمنه اشتروا بيه قصر
تمن الوطن
اذن لدخول السمسره
ما كنتش حرب
ماكنش نصر
واللي رفضناه لاجل نتقدم
حدفنا بعيد ورا




*******
ما تقولش زيي كان وكان

كان حيلة لاجل يموت فقيرها

في طوابير الهوان
وطنك يا صاحبي كان زمان
واللي احنا فيه

زمن العفاريت السمان


*****
اصمد يا صاحبي لموتك العبثي

باعوا الوطن ياصاحبي بالمجان

مجان لكن ما نقدروش أتمان
ما راح زمان ( الشاذلي والجمسي)

وشمس سينا يوم ماعششت

صدرك العريان

غابت فانسى الحرب ياغلبان
أعداء وطننا صاروا أحبابه



ـــ مستمتعين بالوطن والوقت خان الوقت ــ

بيسلكوا وكأنهم أصحابه

أنت العدو دلوقت
أنت نشاز اللحن
أما احنا يا بطلي الحزين
فمدينا لهم للحياه
شريان ورا شريان
زعيقي وسط الخلق زي سكاتي
وتفاؤلي بقى جزء من احباطي
اتغيرت كل العقول





واتبدلت كل الفصول

واتعفرت كل الشموس

واتغبرت كل النفوس
وزي ما تقول قول

!!
اسمك بهت
وكأن عمره ماكان

اتباع كأنه بضاعه ف الدكان

في الانفتاح على عورة الأوطان
آدي الجناة أبرار

...


وانت الخاطي
.


وانت غلطة الوطن
في صفقة الشيطان

يا عبد العاطي

أنت نويت

وأتاري فيه غيرك نوى

ناس عليو فوق

وسابوك بتبحث في الفتات
عن الدوا
لكبدك اللي ما احتملش فانشوى
يا صاحبي موت أرجوك
وموت الغضب

الاسم كان هوه الهدف

رفرف على مرمى النيران




وكأنه قاصد ينضرب

الاسم ضلم وانشطب

ومصر مصرين

مصر احنا وهمه

لهم الغنايم والبهايم احنا

صوتهم وجع مسموم




بيسكن العصب

ويلهب اللهب

ياصاحبي موت أرجوك وموت الغضب
لعينيك ياصاحبي بانتمي
كان صدرك هوه صدر بلادي
من الهجير باجري عليه
واترمي
وأنا قصدي أغسل همي.. بازداد هم
عفوك ياعبد العاطي
الوطن عمي ( بكسر العين والميم)




وامشي وهملنا يابن العم


واسمك المشطوب

مازال هناك مكتوب
في قلب سينا في سرها الدفين
في صدور جميع المخلصين
المرضى زيك ياوطن
واللي حيغلبوا المحن
واللي حيجلو عنه عار الغبار
عشان يشع اسمك كأنه نهار
الاسم ـــ رمز العزة ـــ
بيصيبهم بداء
ينسوك ما ينسوك . الضمير متذكرك
هنا مش هنا ــ صدقني ــ
بكره حافكرك
مين اللي قال يامصر ابنك ضاع؟
دحنا حنعلن ع المشاع




اسم اللي باع حلمك ياعبدالعاطي


للشرق أو للغرب

للأهل أوللغرب ( بضم الغين)



ولحد داك اليوم

سيب الحياه تمشي لورا بالورب

مين ده ياعبدالعاطي
أبو جته جامده وكرش؟
اللي بيحدف بالمتين مليار
ويعز ع الناس قرش؟

!!
هل شفته يوم الضرب؟


هل كان معاك في الحرب؟

أتاري دم الشهدا له أتمان
تمن الشهيد مابيقبضوش والدب
انهب وصيع بينهبو المقاطيع
ويالله بيع كل اللي شلناه للزمان
ويكون شعار بلدك
وبدال ماتبني بيع

.


هنا تكتشف ان الخراب

هوه الربيع

بيع المصانع والصحاري واشتري
آخر حدود الأرض والشواطيء
وهكذا
مصر اللي كانت ملكنا
واللي حميتاها بصدرك عننا

انسحبت واحنا في عز النوم

انسحبت في السر وف كام يوم

هربت كده علنا يا عبدالعاطي

****
مش دي البلاد اللي حاربت عشانها


ولا هم دول ياصاحبي حكامها

ولا مصر دي اللي رفعت أعلامها
ورميت بروحك في خضم الحرب
ونيرانها

.
فين احنا دلوقت ياعبد العاطي


مين اللي وطى العالي ياصاحبي ؟



!!




وعلى الواطي ( بتشديد اللام في على)


مين اشترى بتمنك الصحرا والشاطي

وطاطي

فاكرنا وراه حنطاطي
وصالح القاتل وعادانا
وادانا ضهره وسابنا ببلاهه
نعد قتلانا
وهرب بمصر وخبى عنوانها؟

!!

****
وسنكمل الجزء المتبقي في المره القادمه أنشاء الله

[sabry_kebeish]

السلام عليكم ورحمة الله وبركاته
نقدم اليكم الجزء الأخير من قصيدة عبدالعاطي للشاعر عبد الرحمن الأبنوي




ارحل ياعبد العاطي

يابن الطيبين ارحل





ارحل وحيد مظلوم حزين أسهل

كل القصص ماتت
كل المثل ماعت
كل الحقوق ضاعت
البياعين باعت
أهل القيم صاعت
وأهل الحقوق جاعت
حتى اللي صابت
من جديد خابت
كله اتمسح والزور
هوه اللي شادد خطوته
وثابت
والنصر كان ياعم عبد العاطي
أهم أغلاطك وأغلاطي
ارحل بتتفرج على عشوش اللصوص
المحروسين ببدله ظباطي




!!!

*****



ياللي كسرت القانون

وحاولت وطنك يكون
مات الوطن
ورجعت الميه تاني تمشي في الواطي
يابطل زمانه فات
ياصياد الدبابات
يامجسد الحسرة
فى أسوأ معانيها
ماعدش غير الموت حرية
ارحل ياعبد العاطي
لا أكلو لا ميه
لاحلم بالألوفات ولا الميه
الحسرة وطنية
الحسرة وطنية
دواها لامن صبر ولا من نوم
انت الشهيد اللي ضل وعاش
لحد اليوم
ماعدش شيء ينباع
يا مزعج اللي تاجروا في النسيان
في وطن بيشم بالصمت
وما عادش لازمه سماع




****



عارفك ما متش علة


مت تعب

ماهو كام سنة يا صحابي
يحتمل الحطب... نارالغضب؟
وكل ما تبرق صور في الذاكرة
للدبابات اللي حرقت ( بفتح الحاءوالراء)





أو الجنود اللي قتلت

ولما م الضحك اتمزعت
بفرحة النصر اللي كان ابداع
كل اللي ضاع منك
مع اللي ضاع
تخمدها بكفوفك بصمت رهيب
من غيرما تعتب ع الوطن
وتودي وياه في الألم
وتجيب
كلمنا وانت في السريرعيان





عن اللي ولى ...وخان

وعن اللي باع النصر ف الدكان
مش ده الوطن
اللي اتفقت معاه ياصاحبي زمان
تئن والأنين مرير



وانت بتتقلب على السرير

سرير فقير
تطلق زفير الحزن في النفس الأخير
ولا الشاشات بكيت





ولا المذياع أذاع

فاكشف غطا وجهك
ومزع القناع
بلاحكومة





بلا رئاسة




بلا معارضة




بلا بتاع



.!!

عبد الرحمن الأبنودي



في 16 ابريل
2008






أتوجه بالشكر للشاعر الكبير عبدالرحمن الأبنودي على هذا الإبداع ونتمنى له الشفاء ودوام الصحة والعافية.

[sally]

ميرسى كتيييير م/ صبرى على القصيده الجميله دى


تسلم ايدك

[هيما]

حقيقة مش عارف اكتب تعليق مناسب على القصيدة
لكن
انا بقول ماتخافش ياعبد العاطى
الى زيك كتير وموجودين
وعمرهم ما هيموتوا
وحتى لو ماتوا ووصلوا القبور
اعمالهم خالدة على مر العصور
واكيد هييجى اليوم الى فية الخاين يغور
تحياتى

[حمادة]

شكرا على هذه الكلمات الجميلة التى لاأعرف كيف أعلق عليها (جميلة أم مريرة) شكرا مهندس صبرى
وشكرا لشاعرنا الكبير على هذه الدرر المؤلمة

[مريم يوسف]

السلام عليكم ورحمة الله وبركاته

وليه في أرض المعركه
نسينا كل اللي بلغناه
بالمعاناه
والعرق وبالفخار ..وبالبكا
قصيده جميله بالفعل وواحده من ملاحم الابنودى ( الصعيدى ابن بلدى )

اهدى القصيده وسيرة حياة صاحبها وكاتبها واسكبها فى اذن ........ من اهان اهلى وعشيرتى الصعايده ، وانت ادرى بنفسك
شكرا اخى صبرى
فى امان الله

[ندوة]

قصيدة من وحي الالم الذي نعيشه الان قلبت الموازين وصار كل ابيض اسود وكل اسود ابيض ..ايوجد اكثر من هذا الالم ..

[العراقي انا]

السلام عليكم لولا دماء الشهداء لما خطت اناشيد النصر المعجون بالالم فهم ليسوا بذكرى ابدا هم حاضر ومستقبل وبهم نهتدي والخائن الذي باع شعبه الى مزبلة التاريخ لن يذكر الا للمذمة والعار.
شكرا اخي صبري لتذكيرنا بالعملاق عبد الرحمن الابنودي متمنيا له الشفاء العاجل انشاء الله
ومرفوعة راسك يام الدنيا يامصر وكل وطننا العربي الكبير.
اخوكم ابو عبد الله

[sabry_kebeish]

شكرا جزيلا على المرور والمشاركة لكل الأخوة والأخوات بالمنتدى ( سالي - هيما - حمادة - مريم يوسف- ندوة - أحمد التميمي).
أنشاء الله مصر هتفضل مرفوعة الرأس لن يؤثر فيها بائعين أنفسهم وأن تعثرت ظروف الحياه فلابد للقيد أن ينكسر ذات يوم طالما موجود بها عملاقة كشهداءنا في حرب أكتوبر وعملاقة في مختلف مجالات الحياة.