مساعدة في الزراعة

[alfrawn2]

السلام عليكم نفسي ازرع مرو وتكتمل لحد الأخر أنا زارعت بذور كوكيا وبذور قطيفة كل واحد في أنا ء خاص اما الكوكيا فنبتت ولاكن سيقانها رفيعة جدا وأحيانا عندما تسقى بالماء تغوص في التربة وألجء الى عدلها بغصن رفيع
2- القطيفة وضعت البذور في اناء أغرقتها مياة تركتها نبتت ولاكن بعد فترة قضيت العيد خارج المنزل عدت وجدت التربة جافة وذبلت النبتة لذالك قمت بأغرقها مياها مرة أخرى فذبل ماتبقى من النباتات
3- قمت بذراعة بعض البذور في أكواب كما شاهدت في المنتدى من قبل وبعد ذالك تركتها أرجو أن تدلوني كيف أتعامل مع القطيفة بشكل خاص ومع البذور عامة بشكل عام وخاصتا في الري وشكرا

[ياسمينه]

انا شخصيا بذرع البذور فى الاصيص مباشره واعرضها لمكان فيه ضوء شمس مباشر لان ده مهم جدا لعدم الاستطاله

وبيكون السقى مرتين يوميا مره فى الصبح بدرى ومره فى الليل تجنبا لجفاف الجذور

وبعد 15 يوم بسمد ب سماد npk بس لو مش متوافر مش ضرورى

ولما تكبر ممكن اخلى السقايه مره يوميا

وبالنسبه للزراعه ممكنه فى اى وقت من اوقات السنه على حسب كلام مهندس زراعى
مووووفق

[alfrawn2]

شكرا جزيلا
أنا كنت بشوف في التلفزيون أنهم بيعملو الطريقة دي علشان كدا بعمل زيها ولو في حد يعرف طرق تانية للزراعة بالبذور يقولنا والتعامل مع الكوكيا يكون كيف لأن سيقانها رفيعة جدا

[alfrawn2]

المرحلة بتاعة تفريد الشتلات ياريت اللي يعرف أزاي بتتعمل بالتفصيل يقولي

[ياسمينه]

اتفضل الموضوع ده هيفيدك

http://f.zira3a.net/t32974

بالنسبه لسبب رفع السيقان فا ده بيكون بسبب عدم التعرض للشمس وده غلط جدا للنبات وبتخليه ضعيف اوى

حضرتك ازرع البذور فى التربه وعرضها لضوء الشمس واسقى مرتين فى اليوم

[alfrawn2]

أنا حطيتهم في الشمس زبلت أكثر وهجرب وأقلك في باقي البذور

[alfrawn2]

1- هو مش مرتين في اليوم ممكن تسبب عفونة لتربة؟
2-هو ممكن خضار يتزرع في مكان ظل ويعيش؟

[alfrawn2]

هو أية أفضل طريقة لأخذ العقل الساقية وزراعتها

[alfrawn2]

اتمنى ما تنسونيى
أنا عندي صبار مش بتكبر خالص لو أني حطتلها npk وبطلع جدور من الساق مش عارف لية

[ياسمينه]

مرتين فى اليوم للبذور والنبات الصغير اكيد مش هيسبب اى عفن لان النبات اصلا لسه معندوش جذور

لما النبات يكبر ويضرب جذور يبقى قلل السقايه وخليها مره واحده

خضار يتزرع فى مكان ظل مستحيل لان النبات علشان يكون ثمره محتاج شمس وشمس قويه

النباتات الى ممكن تعيش فى الظل نباتات الظل فققققققققط

العقل الساقيه حضرتك بتختار فرع له مواصفات معينه وبتكون على حسب النبات وبتقص الفرح بطريقه مايله

وتيى بين ورقتين وتقصه بميل وتشيل اخر ورقتين فى الفرع وتغرسه فى التربه وتحطه فى مكان ظل نوعا ما ورطوبه وممكن تغطيه مثلا بكيس نايلون علشان توفر رطوبه كويسه له

افضل وقت من فصل الخريف للربيع يعنى ما بين شهر 9 لغايه شهر 3

الصبار مينفعش معاه ال npk المفترض انه له سماد مخصوص ولو مش بتكبر انقلها لاصيص اكبر قد تكون الجذور محتاجه مساحه علشان تكبر
وبرضه لو ممكن توضح ايه نوع الصبار لانه فيه انواع بتفضل صغيره زى صبار البرص

[هدى نوفل]

مرحبا الاخ alfrawn

ان شاء الله تكون تجاربك كلها موفقة

اولا يجب أن تعرف مواعيد زراعة كل نوع أنت تريد زراعته .

لان النباتات الشتوية تزرع من أول سبتمبر أو اكتوبر و الصيفية تزرع من فبراير الى مارس .

و عند الزراعة تسقى التربة سقية جيدة ثم تضع البذور و تغطيها بتربة خفيفة ثم تستعمل رشاش الماء ( المستعمل للمكواة ) و تضع الاصص فى مكان دافىء و اضاءة جيجة و احيانا يوضع الاصيص فى البيت حتى بداية الانبات تخرج ايضا للضوء .

ثم عند وصول النبات لطول حوالى 10 سم توضع بالتدريج فى الشمس .

و ممكن تغطية الاصيص بعد نثر البذور و الرى رشا بكيس من النايلون و يرفع يوميا لمدة ربع ساعة مثلا حتى لا تتساقط قطرات الماء على البذور فتسبب تعفنها .

و لا تسمد حتى تتكون الاوراق الحقيقية على النبات يعنى حوالى من 5-6 ورقات و يكون التسميد خفيف جدا ليس مثل تركيزه مع النباتات الكبيرة .

و لما تبدأ تجربة جديدة اشركنا معك لنكون معك خطوة بخطوة .

بالتوفيق ان شاء الله

[alfrawn2]

انا فعلا عملت تجربة أخرة ومش هبطل انشاء الله غير لما تنفع معايا
حطيت البذور فالتربة وحطيتها في الظل لح لما نبتت ولما الكوكيا طلعت حطيتها في مكان الشمس بتقعد في حوالي 2 ساعه وبعد كدا بتتنقل وفعلا بعضهم بان النضاره عليه والأخر البذور مسكه في الورقتين الأصليتين لسة صغيرة تقريبا والباقي لم ينبت
هم المفروض ينبتو أمتى عشان بعد المده دي يبقى في مشكلة؟

[ياسمينه]

على فكره غلط جدا انبات البذور فى مكان ظل لان ده بيعمل عمليه استطاله لساق النبات وبيكون صعب انه يستمر

الافضل وضع البذور فى مكان مشمس
اولا لان حراره الشمس بتساعد جدا على سرعه الانبات
ثانيا علشان ميكونش فيه استطاله لساق النبات

ده الكلام من مهندس زراعى كنت باخد معاه كورس زراعه

وبرضه غلط جدا انك تنقل النبات من مكان ظل لمكان شمس لان النبات بياخد وقت علشان يتأقلم مع الظروف المحيطه بيه

النبات ربنا خلقه يكون فى الطبيعه معرض للشمس والهوا بدون اى نقل له كل شويه

موفق

[محب الداليا]

السلام عليكم

اولا وقبل كل شي اشكر صاحب التسائلات على تسائلاته الاخ الكريم ( alfrawn2 ) وارجو من العلى الكريم ان تسر بعملك وتسر بانتيجته

ثانيا الشكر الجزيل جدا جدا للاخوات الكريمات الفاضلات

الاخت التى استفيد منها كثيرا ياسمينه ومعلمتنا الفاضلة التى هي كذالك استفيد منها كثيرا ابلة هدى

ثالثا اثابكم المولى واسعدكم جميعا على طولة بالكم وسعة صدوركم بتلك المحاورات التى اسعدتني كثيرا واستفدت منها كثيرا كثيرا

وخلال تتبعي لتلك المحاوره شدني امر : وارجو ان تجمعو عليه او ان يافصل فيه

البذور ماهو افضل وضع لها حينما تبذر في مكان مضلل او في مكان مشمس

وهل معاملة بذور نباتات الزينة كما هو الحال مع بذور الخضروات والفواكة وايضا بذور نباتات الصبار

اكرر شكري الجزيل لجميعكم

[alfrawn2]

شكرا على المتابعة أنا فعلا كنت حاطط جزء من البذور في بعض الكبيات في الشمس وجزء أخر في الظل عشان أشوف أيهما أسرع ولا كن أنا لحظت أن مفيش حاجه فيهم طلعت:grin: لحد الأن مع أني المره الأولى طلعم بعدها بيومين تقريبا أما الأن فهو اليوم الرابع ولم تنبت


أنا حطيت البذور بتاعت الكوكيا الي نبتت في الشمس وبان عليها النضارة ولاكني نسيت أسقيها فماتت
كنت أتفرجت في التلفزيون على برنامج قديم مدبلج من النجليزية عن الزراعة وهو كان بيزرعهم في ضل عشان كدا أن كنت بقلدو

[محب الداليا]

ابدا اخي الكريم ( alfrawn2 ) لاتشكرني والواجب الشكر اولا لله ثم لكم ولمن تفضل عليكم بإجابتك على تلك التساؤلات

فبعدما شاهدت تساؤلاتك وتلك الاجابات من الغاليات على تساؤلاتك ذهبت لبذور بذرتها وهي لنبته عندي (صبارة) ولم تكن الاولى

فقد بذرت بذورها للمرة الثانية فاسابقة فشلت فعاودت الكره مره اخرى وكنت اضعهم في غرفة المعيشة جميعا وهي تقريبا

تتجاوز الـ (300 ) بذرة فأخيك في الله يريد ان يفتتح مشتل للصبار :) ..( فقط امزح )

لم اعلم ماذا افعل بهذا الكم من البذور فقلت لنفسي لو يطرح الله فيهم البركة وتنتج جميع تلك البذور ماذا افعل بهم

ارجو ان تكون قد فهمت مقصدي من تلك المزحة

المهم فعلت مثلك تماما بعد ان زرت صفحتك قسمتهم الا قسمين وضعت قسم في الخارج في فنائي وتركت القسم الثاني

كما هو في غرفة المعيشة..........اخي الكريم ( alfrawn2 ) اوصيك بالصبر وبمعاودة الكرة مرة اخرى اذا فشلت

فطعم النجاح بعد الفشل ...

كما طعم الايس كريم التوفي الذي به مكسرات عين الجمل ممزوجا بنكة الفراولة وانت تتناولة بعد يوما شاق في عز الحر

ارجو من العلى القدير ان يوفقنا جميعا انت وانا ومن بهذا الصرح الجميل وجميع اخوتنا في كل مكان

[ياسمينه]

من خلال تجربتى جربت ازرع فى مكان مظلل الى ان يتم الانبات وانقله لمكان تانى مشمس

الى حصل ان النبات طلع فيه استطاله فى الساق ولم يحتمل مده ومات

وده طبعا انا معرفتوش الا بعد ما اخدت كورس فى الزراعه وسالت المهندس الزراعى

وهو قال ان افضل طريقه للزراعه تعريض البذور لضوء الشمس وتغطيتها بطبقه رقيقه من التربه

لتفادى عمليه الاستطاله وليكون النبات متعود على درجه الحراره العاليه لانى زرعت فى شهر 6 و 7

وكمان الى قاله ان لاتمام عمليه الانبات محتاج درجات حراره توصل ل 70 فهرنهايت

المهم انى فعلا اشتريت البذور وجربت تانى فى مكان شمس فى الاول عملت مظله تدخل نور الشمس فقط

واكتشفت ان الانبات بيتم بنجاح فى خلال من 3 او 5 ايام لكل البذور

ومع الاهتمام بالسقايه مره فجرا ومره اخرى عند المغرب النبات بيكبر ويستجيب جدا وبنشاط جميل اوى

مجربتش انى ازرع اى نبات يؤكل اللهم الا فلفل الزينه

انما انا اهتمامى بنباتات الزينه فى الاغلب الونكا وعرف الديك و القرنفل الى رافض ينبت باى طريقه

اتمنى انى اكون قدرت افيدك

[alfrawn2]

أكيد حضرتك بتفدينا كتير على الأقل أن لما بغلب ببقى عارف أني في الأخر هرجعلك وتقليلي أعمل أيه بدل ماأحاول على الفاضي :-) نتائج التجربة حتى الأن:
1-بعد مرور أسبوع نمت واحدة من بذور القطيفة و3من بذور الونكا
أنا هجرب تاني والمراضي هضع مجموعه في الظل ومجموعة في شمس متوسطة ومجموعه في شمس مباشره
ممكن أعرف حضرتك ختي الكورس ده في وبكام علشان أنا عندي أرض فضا ورا بيني معمولة مقلب زباله وانا نفسي أنضفها وأزرعها نضفوها وناقص أزرعها بس:-)

[ياسمينه]

متقولش كده احنا كلنا هنا بنتعلم من بعض فى الاول والاخر وبننقل تجاربنا قد تنجح وقد تفشل

وجرب تانى وتلت وعاشر هتنجح فى حاجات وتفشل فى حاجات بس المهم انك هيكون عندك خبره عمليه اكتر

الكورس كان فى جمعيه رساله كان كورس مجانى عن طريقه الزراعه المائيه

بالنسبه لزراعه لو حضرتك حابب ممكن تسالى فى مكان اسمه المعمل المركزى للمناخ ده فى الدقى

هو مكان مخصص للزراعه وتقدر تشترى من هناك الشتلات والمحلول المغذى للنبات وغيره

وممكن برضه تروح كليه الزراعه الى فى شبرا اعرف ان اسعارها رخيصه جدا للشتلات

وعلى حسب علمى لو الارض دى ارض الدوله انت ممكن تقدر تقدم طلب لرئاسه الحى الى تابع عليك

وهو بيساعدك فى تشجير الارض دى و زراعته بيتحمل نص التكلفه وحضرتكم النص التانى

[alfrawn2]

ياعني ممكن يكون في فكلية الزراعة كورس, هيه بصراحه أنا مش عارف هية أرض مين بس أنا مش عايز حاجه من الدوله أنا بأذن الله هزرعها بدل متيقى مقلب زباله تاني
المهم حتى لان لم تنبت سوى بذره قطيفة من أصل 10 ومضى 3 أيام ولم تنبت التى وضعتها في الشمس ولاكني سأصبر سأصبر
عادي ولاكن مش عارف ليه القطيفة بتنبت معدل قليل جدا كدا

[ياسمينه]

فى كليه الزراعه هتلاقى اكيد كورسات للزراعه وزراعه الاسطح كمان

بالنسبه للبذور 3 ايام فتره قليله فى بذور بتاخد اسبوع وفيه بتمتد لشهور كمان

زى عصفور الجنه مثلا بياخد شهرين على ما تنبن وبرضه التمر حنه بتاخد وقت كبير جدا

انت ممكن تجرب فى بذور تانيه انا اسرع شئ نبت عندى كان الونكا والبلاب واللوف ونبات عرف الديك

وزرعت نبات اسمه ابو خنجر ده تقريبا بياخد اسبوع او 5 ايام على ما ينبت

وعندى بذور القرنفل مش بتنبت خالص وفكرت انى ادخلها فى التلاجه مثلا لكسر فتره السكون

او احطها فى الفريزر ومع التغير من البارد للجو الساخن ممكن تنبت

جرب وجرب كتير واصبر وطول بالك وان شاء الله هتتعلم كل حاجه بالراحه وبطوله البال

[alfrawn2]

أنا جربت تاني وحطتها في الشمس زي ماقلتلى ولاكن لأني بنسى أسقيها حطيتها (الفازا) في أناء ووضعت به الماء ونسيت الزرع وطلعت أبص على الزررع لقيته لأول مره منبت ونضر وطولة فعلا مناسب وهقلكو على التطورات

[ياسمينه]

طيب تمام الف مبروك الانبات

بس نصيحه اوعى اوعى تنسى تسقى الجو دلوقتى بقى يميل للبروده اكتر ممكن تسقى كل يوم

بس لازم الميه علشان دى روح النبات ويقدر يكون جذور قويه

[alfrawn2]

طب معلش هو أنا بونائا على أيه بختار العقل الساقية علشان أعرف أختارها ولا أي فرع أخه يطلع وبيكون أمتى أفضل وقت للكلام ده

[ياسمينه]

انا معنديش فكره كبيره عن حكايه التعقيل دى رغم انى جربتها ونجحت فى نبات اسمه كاليوس

والى اعرفه انه سهل جدا تعقيله واكثاره

المهم يعنى انا هقولك على حد علمى ويمكن يكون غلط او صح

العقله بتختلف على نوع النبات يعنى فيه نباتات سهل تعقيلها ونباتات بيكون صعب ومحتاجه اجواء معينه ونباتات اسهل تزرع بذورها

النبات بتاخد منه عقله طرفيه بتختار فرع يكون اخضر وصغير مش متخشب يعنى

وتقل بطول من 10 ل 20 سم وتاخده وتعمل قطع بين اخر ورقتين

وبعدين تشيل الورقتين الى فوق القطع على طول وتغرسه فى التربه وتحطه فى مكان رطب

وتبعده عن الشمس خالص نور فقط

ده على حد علمى

بالنسبه لامتى افضل وقت غالبا غالبا فى الشتا لان الجو بيكون بارد جدا والشمس مش قويه

بس برضه على حسب النبااااات فيه نباتات فى الشتا فى نباتات فى الربيع فيه نباتات سهل تعقيلها فى الصيف

عموما المنتدى فيه تجارب كتير اوى للتعقيل من الاخوه والاخوات ممكن تدور وتجرب

مره واتنين وعشره

انا جربت كتير فيه حاجات ماتت وحاجات كملت وعاشت وفى الشتا باذن الله ناويه اجرب فى الجهنميه وفى الياسمين بامر الله

دور هتلاقى ناس كتير اوى تفيدك

[alfrawn2]

شكرا وانا هدور في الموقع هجرب وأقول لحضرتك النتيجة

[ياسمينه]

الموضوع ده خطير وفيه رح وافى

واسئله واجابات هتفيدك كتير اوى

كيفية عمل العقلة و زراعتها بالصور أ د ربيع أبو الخير (http://f.zira3a.net/t35199)

[alfrawn2]

شكرا دلوقتي التربة أنا لحظت أنا أخضرت تقريبا عفت هقليلها الماء

[ياسمينه]

لا الخضار ده بكتيريا او طحالب مفيده للتربه

لو عفنت النبات هيدبل ويصفر

[alfrawn2]

أه عندك حق طب انا شوفت الموضوع بتاع العقل لاكن مش كل النباتات بينطبق عليها هذه الطريقة فمثلا الياسمين أريد أن أخذ من عقل ولا أجد ساق بها أربع براعم وأن وجد يكون رفيع وصغير

[ياسمينه]

الياسمين بتختار فرع يكون بقاله سنه او اكتر يكون عليه 6 عيون او اكتر

انا لسه قاطعه واحد امبارح من جنينه جنبنا وعملت كل حاجه وحطيته فى ميه

وكمان يومين هنقله فى الاصيص واغطيه

انا جربته كذا مره ولا مره عاوز ينجح معايا مش عارفه ليه

بس بجرب تانى دى يمكن تالت او رابع مره اقص ياسمين يارب ينجح بقى

[alfrawn2]

يارب وأنا هجرب معاك هو أيه العيون دي ياعني شكلها أية

[ياسمينه]

مش العود بيكون عليه ورق اخضر كده هى دى العيون على حسب علمى

بس خليه فى الميه 3 ايام زى ما الموضوع بيقول

والله انا خايفه يعفن من الميه ههههههه بس ربنا يسترها بقى

[alfrawn2]

أهو أدينا بنحاول أنا سمعت عن الزراعة بالترقيد وجربتها بس لسا مفيش نتيجة

[alfrawn2]

أنا حطيت الزرع في صوبة من أختراعي علشان موجة البرد دي بس مش عارف هتنفع ولا أية

[ياسمينه]

ان شاء الله هتنفع بس دلوقتى البرد مش شديد اوى لدرجه صوبه النباتات بتتحمل لدرجه 15 او 16 مؤيه على حسب علمى

والنباتات الشتويه تتحمل البرد جدا

[alfrawn2]

الشتوية دي زي أية مثلا
علشان نبدأ فيها بالمرة وهسيب الصيفية بردك

[ياسمينه]

الشتويه البيتونيا وحنك السبع والريحان والنعناع والاقحوان وممكن لبلاب و لو خضروات خس وجرجير وبقدونس وشبت وقطيفه وقرنفل

يعنى جرب كده وان شاء الله تنجح

[alfrawn2]

الحمد لله البذور طلعت ودلوقتي عندي 45 شتلة وهصور هلكو وبعتها
وأنا نفسي أعرف أخذ شتلات قولولي كدا على حاجه سهلة أتعلم فيها لأني كل الشتلات الي بخدها بغطيها بكيس وبعدين بتعفن هل من المفروض أحطها في شمس شديدة ولا خفيفية ولا أيه

[alfrawn2]

برجاااااااااااااااااااااااء ما تنسونييييييييييي

[alfrawn2]

المفروووووووووووووووووووووووووووووو وووووووووووض الشتلة تطلع في أد أيه