مساعده لتصنيع زبادي

[متعب السعيد]

ارجو من الساده أعضاء ومشرفي قسم الالبان مساعدتي في معرفة كيفية تصنيع الزبادي البلدي وزبادي الشركات وماهي أنواع المثبت المضافه لزبادي الشركات وما هو اللبن المستخدم للزبادي البلدي مع توضيح نسبة الدهن المثلى في الزبادي البلدي واذا اردت اضافة اسانسات فما هي نسب الإضافه

[احمد على على]

مساء الفل يا باشمهندس عماد
اخوك احمد عندى معمل لتصنيع الزبادى
لو عايز تعمل زبادى احلى من النستله و الجهينة تعمل الاتى
اولا مصدر جيد للالبان و الاحسن لبن جاموسى
= تفرز نصف كمية اللبن المطلوب تصنيعه و تضيفها على النصف الاخر
الغلى
تغلى اللبن على نار هادئة مع التقليب -- ليه علشان اللبن لا يشيط منك و يتغير طعمه و لونه ممكن يغمق و دا مش مطلوب و يفضل غلى كميات لا تتجاوز 10 كيلو فى الحلة اما الغلايات الكبيرة غير مرغوب فيها
بعد الغلى
ضع اللبن المغلى فى قسط و يفضل ستانلس و ضع القسط فى ماء بارد = انا عامل بانيو احط فيها الاقساط بعد غلى اللبن لحد درجة الحرارة تنزل ل 45 درجة
التلقيح
بعد كدا تنقل اللبن لتنك التلقيح ممكن يكون اى وعاء معدنى
البادئ
البادئ اللى هو الخميرة تحط 300 جم لكل 10 ك لبن دا فى الشتاء و 200 جم فى الصيف
البادئ عبارة عن زبادى بلدى طازج و حط خط تحت طازج ليه علشان كل ما بيقدم تضعف الخميرة اللى فيه و يطلع الزبادى رخو القوام
ابعد من زبادى الشركات فى الخميرة
فى خميرة جاهزة تتباع عند بائعى مستلزمات الالبان علبة ب 85 ج بتعمل 250 ك لبن و فى الصيف بتعمل 300 ك
تحط الخميرة فى اناء و تقوم بدعكها جيدا بملعقة و بعد كدا حط تقريبا نصف كيلو من اللبن عليها و قلب جيدا لحد ما تدوب الخميرة
حط اللبن ابو خميرة على باقى كمية اللبن و قلب جيدا
حط 5جم سوربات بوتاسيوم على ال 10 ك لبن و قلب جيدا و دى مادة حافظة مصرح بها و بتدى صلاحية توصل لعشرة ايام فى عز الصيف
التنقية
دى عملية مهمة باعمل ايه
اصفى اللبن الملقح فى شاش زى بتاع الجبنة كدا او اى مرشح دقيق الفتحات عشان امنع وجود اى بواقى او تكتلات من الخميرة لم تذوب فى اللبن
و العملية دى بتطلع الزبادى ناعم زى الزبدة
بعد كدا ابتدى تعبئة الاكواب باللبن و هى مرصوصة مسبقا فى صينية الحضان
ملحوظة -- الحضان يكون شغال قبل وضع الاكواب فيه
و اظبط الترموستات بتاع الحضان على 35 الى 37 درجة
بعد 3 ساعات او 4 افتح الحضان و بعد التاكد من تمام الاستواء طلع صوانى الزبادى و خليها برة فى الهواء حوالى نصف ساعة للتهوية
عشان متعملش بخار على غطاء العلبة يتكثف و ينزل على الزبادى من جوة و دا عيب فى المنتج
بعد كدا حط الزبادى فى الثلاجة لمدة 4 ساعات بعد كدا تقدر تنقاه و تسوقة فى اى مكان
=====================
بالنسبة للمثبتات انت ممكن مش هتحتاج لها
لكن فى شركة اسمها magic line و دى فى الشرقية بتصنع مثبتات للالبان المختلفة منها الزبادى
في الشرقيه يوجد محمد ع المنعم وابو راغب و عادل مصباح يمكن طلب المثبت منهم ٠١٠٠٥٥٤٨٤٦٣ و٠١١١٦٨٧٠١٦٠ و٠١٠٠١٨٣٠٩٥٩ تليفوناتهم بالترتيب
==============